ಬಸ್ಸಿಗೆ ಕಾದು ಸುಸ್ತಾದಾಗ
ಸೀಟೂ ಸಿಕ್ಕದೆ ನಿಂತಿದ್ದಾಗ
ಬ್ರಹ್ಮವೆ ಸತ್ಯ ಜಗತ್ತು ಮಿಥ್ಯ
ಅನ್ನಿಸಿತೇ ನಿಮಗನ್ನಿಸಿತೇ ?
ತಿಂಡಿಯ ಮೇಲೆ ತಿಂಡಿಯ ತಿಂದು
ಹೊಟ್ಟೆ ತುಂಬದೆಯೂ ಬಿಲ್ಲನು ಕಂಡು
ಬೆಚ್ಚಿ ಬಿದ್ದಿರಿ ಎದ್ದು ನಿಂತಿರಿ
ಬ್ರಹ್ಮವೇ ಸತ್ಯ ಜಗತ್ತು ಮಿಥ್ಯ
ಅನ್ನಿಸಿತೇ ನಿಮಗನ್ನಿಸಿತೇ ?
ತಿಂಗಳ ಸಂಬಳ ಜೇಬಿಗೆ ಹಾಕಿ
ಓಡಿಯೇ ಬಂದಿರಿ ರೂಮಿಗೆ ಜೀಕಿ
ಪರ್ಸನು ತೆಗೆದರೆ ದುಡ್ಡೇ ಇಲ್ಲ
ನೀರಗುಳ್ಳೆಯು ನಿಜವೇ ಅಲ್ಲ
ಬ್ರಹ್ಮವೇ ಸತ್ಯ ಜಗತ್ತು ಮಿಥ್ಯ
ಅನ್ನಿಸಿತೇ ನಿಮಗನ್ನಿಸಿತೇ ?
ಹಿತ್ತಿಲ ತುಂಬಾ ದುಡ್ಡಿನ ರಾಶಿ
ಮನೆ ಎದುರಲ್ಲೇ ನಿಂತಿದೆ ಕಾಶಿ
ಸುಖವೇ ಸುಖ ಆಹಾ ಸಖ
ಎಲ್ಲಾ ನಿನ್ನದು ಹೇ ಗಜಮುಖ
ಎದ್ದು ಕುಳಿತರೆ ಎಲ್ಲವೂ ಕನಸು
ಹಿತ್ತಿಲಿನಿಂದ ವಾಸನೆ ಹೊಲಸು
ಬ್ರಹ್ಮವೇ ಸತ್ಯ ಜಗತ್ತು ಮಿಥ್ಯ
ಅನ್ನಿಸಿತೇ ನಿಮಗನ್ನಿಸಿತೇ?
ಪ್ರೀತಿಯ ಗೆಳೆಯ ಕೆಂಡ ಕಾರಿದ
ಅಪ್ರಾಮಾಣಿಕ ಎಂದೇ ಜರಿದ
ನಿಮ್ಮೆದುರಲ್ಲೇ ಕವಿತೆಯ ಹರಿದ
ವಿಟ ನಗೆ ನಕ್ಕ ಅಯ್ಯೋ ಠಕ್ಕ !
ಬ್ರಹ್ಮವೇ ಸತ್ಯ ಜಗತ್ತು ಮಿಥ್ಯ
ಅನ್ನಿಸಿತೇ ನಿಮಗನ್ನಿಸಿತೇ ?
*****
